Bebras áskorunin - Ísland

 
 

Velkomin/n

Velkomin í Bebras áskorunina!

Verkefnið er keyrt samhliða í flestum löndum heimsins í byrjun nóvember ár hvert.

Bebras áskornuninn kannar rökhugsun og tölvufærni með því að láta þátttakendur leysa krefjandi verkefni. Það kostar ekkert að taka þátt og hvetjum við alla skóla til að vera með.

Ísland hefur tekið þátt í Bebras áskoruninni með góðum árangri frá árinu 2015. 

ÁR FJÖLDI SKÓLA FJÖLDI NEMENDA
2015 14 475
2016 18 1780
2017 24 2045

Hvernig fer keppnin fram?

Allir taka þátt í sömu vikunni. Keppnin virkar í helstu vöfrum og á spjaldtölvum.

Spurningarnar eru miðaðar við aldur og mögulegir aldurshópar fimm: 8-10, 10-12, 12-14, 14-16 og 16-18 ára. Þegar nemendur eru stofnaðir í kerfinu þarf að ákveða hvaða aldurshópi þau tilheyra.

Eina sem þarf að gera er að skrá skólann að hausti í gegnum www.bebras.is/admin og í framhaldi að stofna aðgang fyrir þá nemendur sem ætla að taka þátt. Ferlið er einfalt og tekur ekki langan tíma.

Leiðbeiningar fyrir nemendur sem taka þátt í keppninni:

  1. Skrá sig inn með því að ýta á "Innskráning" efst á síðunni og setja inn notandanafn og lykilorð sem kennari hefur deilt til nemenda.
  2. Eftir að notandi hefur verið skráður inn þarf að ýta á "Keppnir" og velja aldurshóp sem þátttakandi er skráður í.
  3. Við upphaf áskorunar eru allar spurningar merktar „Ósvarað“ á aðalsíðu. 
    Þetta mun breytast þegar hafist er handa við að svara spurningunum.
  4. Það eru 10-15 spurningar í heildina sem þarf að svara.
  5. Það er hægt að breyta svari hvenær sem er og svara spurningum í þeirri röð sem þátttakandi kýs.
  6. Það er alltaf hægt að eyða svari sem hefur þegar verið skráð inn. Þessi valmöguleiki birtist sem síðasti valmöguleikinn þegar hægt að velja fleiri en einn valkost. Munið að sumar spurningar þarf að VISTA sérstaklega og þá með því að ýta á vista hnapp neðst í spurningu- en flestar vistast sjálfkrafa 
  7. Þátttakendur hafa 45 mínútur til að ljúka keppni en niðurtalning á tíma sést efst í hægra horni á skjánum samhliða áskoruninni.
  8. Þegar búið er að svara öllum spurningunum þarf að velja ENDA KEPPNI neðst í vinstra horninu - og svara já!
  9. Einkunnir/stig er ekki hægt að sjá fyrr en nokkrum dögum eftir að keppni lýkur.

Hvað er Bebras?

Bebras var upphaflega stofnað af Prófessor Valentina Dagiene hjá Háskólanum í Vilnius, en Bebras (e. Beaver) er heitið á dýrinu Bifur á litháísku. Hún fékk hugmyndina þegar hún var að ferðast um Finnland árið 2003 og hugmyndinni er ætlað að vekja áhuga nemenda á því að kynnast upplýsingatækni. Hún ákvað að nýta bifur sem ímynd áskoruninnar vegna þess dugnaðar og fullkomnunaráráttu sem þeir virðast hafa. Bifrar eru duglegir, vinnusamir og gáfaðir; og þeir vinna stöðugt í stíflunum sínum, bæði til að gera þær betri og stærri. Til gamans bendum við á að nóg efni er til á Youtube ef áhugi er fyrir að skoða hvernig bifurinn vinnur - kannski áhugavert þar sem dýrið finnst ekki á Íslandi og þekkja krakkar því ekki dýrið vel.

Fyrsta Bebras áskorunin var í Litháen árið 2004 en áskorunin hefur stækkað gríðarlega á stuttum tíma og var með yfir 500.000 þátttakendur árið 2012. Bebras er ein fjölmennasta áskorun sem notuð er til kennslu í upplýsingatækni

Eitt af markmiðum Valentinu Dagiene var að gera Bebras að alþjóðlegu átaki í fræðslu um upplýsingatækni í skólum. Fjöldi Evrópulanda hafa bæst í hópinn en Eistland, Þýskaland, Holland og Pólland voru fyrst til að bætast í hópinn árið 2006. Árið 2008 bættust Austurríki, Lettland og Slóvakía í hópinn. Árið 2009 hélt Ítalía fyrstu innanlandskeppnina sína og Finnland og Sviss gerðu það sama 2010. Frakkland, Ungverjaland og Slóvenía bættust í hópinn árið 2011 ásamt því að Japan var fyrsta landið utan Evrópu til að halda innanlands Bebras áskorun. Sama ár gerðu Belgía, Canada, Kýpur, Ísrael og Spánn prufuáskoranir fyrir nemendur sinna landa. Árið 2012 bættust síðan Búlgaría, Svíþjóð og Taivan í hópinn. Árið 2015 tekur Ísland þátt í fyrsta skipti.

Nánari upplýsingar um Bebras má finna á www.bebras.org 

Ský er í forsvari fyrir Bebras á Íslandi og hægt að fá nánari upplýsingar í gegnum sky@sky.is